माझे डोळे शोधतात
तुला तेंव्हा तरी येऊन जा
माझ्या हातावरची एक
रेघ तुझ्या कपाळी घेऊन जा....
विसर माझं प्रेम
विसर माझं समर्पण
तुझ्या एकलकोंड्या
रात्रींसाठी तरी माझं चांदणं घेऊन जा....
एक कूस माझी ओली एक
तुझी कोरडी
तुझ्या दगड
गोट्यांच्या वाटेसाठी एक निर्झर घेऊन जा....
थोडे रेंगाळू दे
तुझे पाय माझ्या खोपटापाशी
तुझ्या अजस्त्र
बागेसाठी एक तुळस घेऊन जा....
तुझ्या अंगणातला
प्राजक्त तुझ्याच अंगणात बरसू दे
माझ्या ओंजळीत फक्त एक कळी देऊन जा... 